Uropi Wiki
Register
Advertisement
Acer saccharum

Aklòn — Acer saccharum

Acer saccharum fole

Fole akloni — Acer saccharum

Aklone se dreve id drevite de genari Acer, de famili Aceracis. Li frute se dupli fleli uni seve.


Etimologij[]

Vize de artikel de etimologic vordari ov di vord.


Beskrivad[]

De majsan aklone se dreve alti intra 10 id 40 metre hol, ba eke se os drevite. De majsan spese perlàs siu fole in otèm, ba eke, in sudi Azia id beròn Midimàr, gar la tra tal jar. Jun aklone uspèr bun u mank luci, simte lu moz greso ude de maj alti gresen dreve.

De blume se miki ; de petale se longi intra un id ses milimetre, id mank talim in eke spese. Lu se glen, ʒel, aranʒi o roj. Blumad usvèn be fend vimu o inìz vernu. Obte de blume se miki, de tali bluman drev moj so inpresan in eke spese. Blume se u bun spija polini in pru verna po insekte.

De frut aklòni kostajo in du seve ki un usgrès semli a u flel : je somiv a u virtèl id moz flevo tra gren apstade tis lu fal su bod. Je nud dod eke sedias tis ses mone, slogan de spese, po mavrivo su de drev id falo (indèt : flevo ap) suprù dapòs.

Un uz aklone po li drov, po mako moble, gitare id roliplanke, id in hasistruad, in os, in Nordi Amerika, po produto akloni siròp.


Simbolij[]

De fol akloni vid vizen su de flag Kanadu id su alten flage id simboli pictene in Kanada.



Akloni siròp[]

Veti kuvad akloni siropi

Veti mod akuvo akloni saf.

Kubel be aklòn

Kubel po akloni vod.

Akloni siròp se resultad de kuvadi aklòni safi be inìz vernu. De saf av u sukri gust solem in da tem, id je se nudi avo frozi noce id anfrozi dias pote de aklone fluj. Un nud od 35 tis 40 litre akloni safi po mako un liter akloni siròp.

Be de avenad Europanis in numi Kebèk, Indiane zavì ʒa kim mako akloni siròp id uzì ja wim asuni nur in verna.

De uz akloni siròp se generalizen in Kebèk (wo vid produten 71&nbps;% moldi produtadi). Akloni siròp vid os usporten a alten lande, cevim a Japonia.


Makad akloni siropi[]

Par klimati parsade, akloni siròp vid produten cevim in Kebèk, ba os in de Kanadan provinse Ontariò id Novi Brunswìk id in eke state USA, Novi Jork, Vermònt id Novi Hampshire. Tri spese aklonis vid uzen : sukri aklòn (Acer saccharum), nar aklòn (Acer nigrum) id roj aklòn (Acer rubrum).

Po kropo de aklòni saf (nomen aklòni vod : eau d'érable), un moz poro in de drev (gren dreve moj acepo vari pore;  un usvàlt de grenad un akloniu pa de numar poris, nè de numar drevis) ; tradisionim, un fistì u kubel po rucepo de safigope, id un itì ki u szilèl od drev a drev po vuzo de kuble, ba, in numidias, un uz u sistèm tubis po sugo de saf direktim a de kuvia.

De kuvad de siropi se fenden wan je av u temperatùr 3,5˚ maj hol te de normal kuvitemperatùr (idsim 103,5˚ be maraltid). Num un moz uzo os un ankuvi metòd po densizo de fluid (osmose inversée). Dapòs un klasiz de siròp slogan je klor ; maj klar siròp se maj altim klasizen id av u maj fin gust.


Alten produte[]

Maple toffee

Je se mozli akuvo de aklòni siròp tis 113,5˚ id lijo de odtenen fluid su snev. De fluid davos vid fist id vid kosamen ki u miki drovi stik po anmidi jedad.

Je se os mozli akuvo de siròp tis tal vod av viden uskuven ; un odtèn davos akloni suker.

Akloni feste[]

Akloniu jedad

Tradisioni jedad un akloni festi

Je se tradisioni in Kebèk vizìto u akloniu has (indèt u spesial restoria bemìd un akloni bosk) be jaki pru verna (wan je se jok snev su bod) id avo za u tradisioni jedad, ki akloni produte, panpeke, omlete, swinimiadi produte. Da se u rumenad de jedadis pos Paski fastitèm.



Perij Spija

De intèn di artikli se in gren part u tradutad de Franci Wikipediu artikils Érable id Sirop d'érable

Advertisement